Friday, November 19, 2010

ಪುಟ್ಟ ಬಟ್ಟೆ ಮತ್ತು ಗಾಳಿಪಟ ದಾರ

ಮೊನ್ನೆ ಅಮ್ಮನ ಜೊತೆ ಪೋನ್‍ನಲ್ಲಿ ಮಾತಾಡುವಾಗ ಬಹಳ ಸಂಭ್ರಮದಿಂದ ಕೇಳಿದಳು - ’ಮನೆ ಕ್ಲೀನ್ ಮಾಡುವಾಗ ಏನು ಸಿಗ್ತು ಹೇಳು ನೋಡೋಣಾ’ ?

ಸಾನ್ವಿ ಜೊತೆ ಆಡುತ್ತಿದ್ದ ನನಗೆ ಗೊತ್ತಾಗಲಿಲ್ಲ. ಅಮ್ಮನೇ ಮುಂದುವರೆಸಿ ಹೇಳಿದಳು ’ನೀನು ಚಿಕ್ಕವನಿದ್ದಾಗ ಆಸೆಯಿಂದ ಕೂಡಿಡುತ್ತಿದ್ದ ಬಣ್ಣ-ಬಣ್ಣದ ಅಂಗಿ ಗುಂಡಿಗಳ ಡಬ್ಬ ಸಿಗ್ತು! ಅದರ ಜೊತೆ ಗಾಳಿಪಟ ಹಾರಿಸುತ್ತಿದ್ದ ದಾರದುಂಡೆ !!’ .

ಚಿಕ್ಕವನಿದ್ದಾಗಿನ ನನ್ನ ಅಂಗಿ ಗುಂಡಿಗಳ(ಬಟನ್) ಬಗೆಗಿನ ಆಸಕ್ತಿ, ಅಪ್ಪನ ಜೊತೆ ಹಾರಿಸುತ್ತಿದ್ದ ಗಾಳಿಪಟಗಳು..ಹಾಗೇ ಅನೇಕ ದೃಶ್ಯಾವಳಿಗಳು ಕಣ್ಮುಂದೆ ಸಾಗಿ ಹೋದವು. ನಾನು ಆ ಡಬ್ಬ, ಅ ಬಣ್ಣದ ಗುಂಡಿಗಳನ್ನು ಬಹುತೇಕ ಮರತೇ ಬಿಟ್ಟಿದ್ದೆ. ಆದರೆ ಅಮ್ಮ ಅದನ್ನು ಇಷ್ಟು ವರ್ಷ ಜೋಪಾನವಾಗಿ ಎತ್ತಿಟ್ಟಿದ್ದು ಮತ್ತು ಆ ಡಬ್ಬ ಸಿಕ್ಕಾಗ ಸಂಭ್ರಮಿಸಿದ ರೀತಿ ನನಗೆ ವಿಸ್ಮಯವುಂಟು ಮಾಡಿತ್ತು.

ಅದರ ಬಗ್ಗೆ ಯೋಚಿಸುತ್ತಿರುವಾಗ, ಸಾನ್ವಿ ಅಮ್ಮ ಚೀಲವೊಂದರಲ್ಲಿ ಏನೋ ಜೋಡಿಸುತ್ತಿದ್ದಳು. ನೋಡಿದರೆ ಸಾನ್ವಿಯ ಪುಟ್ಟ ಬಟ್ಟೆಗಳು.

ಹುಟ್ಟಿದಾಗ ಸಾನ್ವಿಗೆ ತಂದಿದ್ದ ಬಟ್ಟೆಗಳಲ್ಲಿ ಹಲವು ಈಗ ಮೂರು ತಿಂಗಳ ನಂತರ ಆಗುತ್ತಿರಲಿಲ್ಲ. ನೋಡುನೋಡುತ್ತಾಲೇ ಸಾನ್ವಿ ಆ ಬಟ್ಟೆಗಳಾಚೆ ಬೆಳೆದು ಬಿಟ್ಟಿದ್ದಳು. ಆ ಚಿಕ್ಕದಾದ ಬಟ್ಟೆಗಳ ಉಸ್ತುವಾರಿಯನ್ನು ಸಾನ್ವಿಯ ಅಮ್ಮ ವಹಿಸಿಕೊಂಡು ಚೀಲದಲ್ಲಿ ತುಂಬುತ್ತಿದ್ದಳು.

ಈ ಚಿಕ್ಕದಾದ ಬಟ್ಟೆಗಳಲ್ಲಿ ಸಾನ್ವಿಯ ಬಾಲ್ಯದ ನೆನಪುಗಳನ್ನು ಹೆಕ್ಕಿ ಜೋಪಾನವಾಗಿ ಇಟ್ಟುಕೊಳ್ಳುವ ಪ್ರಯತ್ನದಲ್ಲಿದಂತೆ ಸಾನ್ವಿಯ ಅಮ್ಮ ಕಂಡಳು. ಆ ಬಟ್ಟೆಗಳನ್ನು ಸಾನ್ವಿ ಅಮ್ಮ ಜೋಪಾನಿಸುತ್ತಿದ್ದ ರೀತಿ ಮತ್ತು ಅದರ ಬಗೆಗಿನ ಪ್ರೀತಿ ನೋಡುತ್ತಿದ್ದೆ.

ಬಣ್ಣದ ಗುಂಡಿ-ಗಾಳಿಪಟದ ದಾರದುಂಡೆ ಕಂಡ ಅಮ್ಮನ ಸಂಭ್ರಮ ಈಗ ನನಗೆ ಅರ್ಥವಾಗತೊಡಗಿತ್ತು.

ಆ ಡಬ್ಬದಲ್ಲಿ , ಪುಟಾಣಿ ಬಟ್ಟೆಗಳಲ್ಲಿ, ಆ ಗಾಳಿಪಟ ದಾರದಲ್ಲಿ ಬಾಲ್ಯದ ಕೊಂಡಿಗಳು ಹೆಣೆದುಕೊಂಡದ್ದು ಗೋಚರವಾಗಿತ್ತು.

ಚಿಕ್ಕದಾದ ಬಟ್ಟೆಗಳನ್ನು ಜೋಡಿಸುವ ಸಾನ್ವಿ ಅಮ್ಮನ ಕಾರ್ಯ ಮುಂದುವರೆದಿತ್ತು.

ಇದ್ಯಾವುದರ ತಂಟೆಯಿಲ್ಲದೆ ಸಾನ್ವಿ ತನ್ನ ಪಾಡಿಗೆ ತಾನು ಆಡುತ್ತಿದ್ದಳು.

10 comments:

  1. ನೆನಪುಗಳು ಹಾಗೇ.ಯಾವುದೋ ಕೊಂಡಿ,ಯಾವುದೋ ಸುಂದರ ನೆನಪುಗಳ ಸರಮಾಲೆಯನ್ನೇ ಬಿಚ್ಚಿಡುತ್ತದೆ.ಕಾಲೇಜಿನ ನೆನಪೊಂದನ್ನು ಬ್ಲಾಗಿನಲ್ಲಿ ಹಂಚಿಕೊಂಡಿದ್ದೇನೆ.ಭೇಟಿಕೊಡಿ.ನಮಸ್ಕಾರ.

    ReplyDelete
  2. nice :) ನಾನು ನನ್ನ ಮಗಳು ಪುಟ್ಟಪಾಪುವಾಗಿದ್ದಾಗ ಹಾಕುತ್ತಿದ್ದ ಬಟ್ಟೆಗಳನ್ನೊಮ್ಮೆ ತೆಗೆದು ಸವರಿದೆ.

    ReplyDelete
  3. ಸವಿ ನೆನಪು ಬೇಕು ಸವಿಯಲೀ ಬದುಕು :)))

    ReplyDelete
  4. ಕೃಷ್ಣಮೂರ್ತಿ ಸರ್,
    ಧನ್ಯವಾದಗಳು..ನೀವು ಹೇಳಿದ ಹಾಗೆ ನೆನಪಿನ ಸುರಳಿ ಬಿಚ್ಚಕೊಳ್ಳುತ್ತಾ ಹೋಗುತ್ತೆ.

    ReplyDelete
  5. ಸುಮ,
    ಮನಕ್ಕೆ ಮುದ ನೀಡುವ ಮಗುವಿನ ಸಾಂಗತ್ಯ ಎಷ್ಟೊಂದು ಹಿತಕರ !

    ReplyDelete
  6. ಪುಟ್ಟಿಯ ಅಮ್ಮ,
    ವಂದನೆಗಳು ನಿಮ್ಮ ಪ್ರತಿಕ್ರಿಯೆಗೆ :)

    ReplyDelete
  7. ಬರಹ ಓದಿ ಮನಸ್ಸು ಕೆಲ ಸಮಯದ ಹಿ೦ದೆ ನಡೆಯಿತು.ಇ೦ತಹ ನೆನಪುಗಳನ್ನು ನೆನಸಿಕೊ೦ಡಷ್ಟೂ ಅವುಗಳ ಸಿಹಿ ಹೆಚ್ಚಾಗುತ್ತದೆ.
    cute saanvi..

    ReplyDelete
  8. ಮನಮುಕ್ತಾ
    ಧನ್ಯವಾದಗಳು !

    ReplyDelete
  9. savi savi nenanpu...saavir nenapu!!!!!!!

    ReplyDelete
  10. ಮಹಾಂತೇಶ್,
    ಹೌದು :)
    ಧನ್ಯವಾದಗಳು

    ReplyDelete